KESHENI

Basi kesheni, kwa sababu hamwijui siku wala saa. Mathayo 25:13.
 
Kuja kwa Kristo kutakuwa kama ambavyo ingelikuwa usiku wa manane, wakati watu wote wakiwa wamelala. Itakuwa vema kwa wote kuandaa hesabu zao kikamilifu kabla ya jua kutua. Matendo yote yapaswa kuwa sahihi, biashara zote zapaswa kuwa za haki, kati ya mtu na mwenzake. Hali zote za kutokuwa waaminifu, mazoea yote ya dhambi yapaswa kutupiliwa mbali. Mafuta ya neema yapaswa kuwa katika vyombo vyetu pamoja na taa zetu. . . Kwa hakika itakuwa huzuni kwa yule ambaye hali ya roho yake imekuwa na mfano tu wa utauwa huku akizikataa nguvu zake; ambaye amekuwa akimuita Kristo Bwana, Bwana, na bado hana mfano wake wala maandiko yake. ..

Kwa neema Mungu anatoa siku ya rehema, muda kwa ajili ya jaribio na maonjo. Anatoa mwaliko: “Mtafuteni Bwana maadam anapatikana, mwiteni maana yu karibu”. . .
 

 

 

Leo sauti ya rehema inaita, na Yesu anavuta watu kwa kamba za upendo; lakini siku yaja ambapo Yesu atavaa mavazi ya kisasi. . . Uovu wa dunia linaongezeka kila siku, na hatua fulani inapokuwa imefikiwa, kitabu kitakuwa kimefungwa, na hesabu zitakuwa zimekamilishwa. Hakutakuwa na kafara kwa ajili ya dhambi tena. Bwana anakuja. Kwa muda mrefu rehema imenyoosha mkono wa upendo, subira na uvumilivu, kuelekea kwa dunia yenye hatia. Mwaliko umetolewa, “Hebu na ashikilie nguvu zangu...” Lakini watu wametumia vibaya rehema na kukataa neema.
Kwa nini Bwana amekawiza ujio wake hivyo? Jeshi zima la mbinguni linasubiri kukamilisha kazi ya mwisho kwa dunia hii iliyopotea, Kazi hiyo haijakamilishwa kwa sababu wachache wanaodai kuwa na mafuta ya neema katika vyombo vyao na taa zao, hawajakuwa nuru ing’aayo na kuiangaza dunia. Ni kwa sababu wamishenari ni wachache. . .
 

 

 

Kila juma linapopita linamaanisha juma moja limepungua, kila siku ipitayo inaashiria siku moja ya karibu zaidi kufikia wakati uliowekwa kwa ajili ya hukumu. Inasikitisha kwamba wengi wanayo dini ya msimu - dini inayotegemea hisia na kutawaliwa na misisimko. “Yeye atakayevumilia hadi mwisho ndiye atakayeokoka.” Hivyo jichunguzeni na kuhakikisha kama mnayo mafuta ya neema ndani ya mioyo yenu. Kuwa na mafuta haya kutatengeneza ule utofauti utakaohitajika katika hukumu.

SODA NINI KATIKA MWILI WAKO?

Inawezekana una bahati sana kuiona hii makala na itakujenga sana kiafya...tafiti zinasema kwamba mtu mmoja anayekunywa soda moja kwa siku, anakunywa zaidi ya galoni au dumu 56 za soda kwa mwaka. japokua kuna watu wamekiri kunywa hata zaidi ya soda moja kwa siku amabayo huenda wanakunywa zaidi ya hicho kipimo. biashara ya soda inalipa sana duniani kwani ni kinywaji cha pili kinachoongoza kunywewa duniani baada ya maji.
yafuatayo ni madhara ya soda ambayo yatakufanya ufikirie mara mbili kunywa soda tena.
1. Ugonjwa wa kisukari; kunywa soda moja ni sawa na kunywa vijiko 10 vya sukari, baada ya kunywa sukari hupanda sana mwilini na kongosho hutoa homoni ya ili insulini nyingi kushusha sukari. muda unavyozidi kwenda insulini huendelea kuishiwa nguvu[insulin resisitance] na hali hii husababisha kisukari.

 2. Unene na kitambi; utafiti ulofanywa na chuo kikuu cha havard umegundua kwamba watu wanaokunywa soda hunenepa mara mbili zaidi ya wale ambao hivyo kama uko busy unapunguza uzito na pia mnywaji wa soda basi unapoteza muda.

3. Upungufu wa madini muhimu mwilini; soda ina kemikali inayoitwa phosporic acid ambayo huzuia mwili kuchukua madini ya calcium kwenye chakula ambayo ni muhimu sana kwa ajili ya mifupa na misuli yenye afya kweye mwili wa binadamu.

4. Ugonjwa wa kansa; soda ina kemikali inayoitwa caffeine ambayo imehusishwa na cancer mbalimbali za mwili mfano kansa ya kongosho, kansa ya utumbo na magonjwa mengine kama presha ya damu na kansa ya matiti.

5. Huongeza sumu mwilini; soda haina lishe wala faida yeyote ile kwenye mwili wa binadamu hivyo huongeza kiasi kikubwa cha sumu mwilini ambacho ni hatari sana kwa afya mtumiaji.sumu hizo huongeza hatari ya kupata ugonjwa wa presha, na kuua figo.

6. Hubadilisha rangi ya meno; kila mtu anataka kua na meno masafi na meupe lakini baadhi ya soda zina kiasi kikubwa cha tindikali ambacho hushambulia na kuharibu meno kwa muda mfupi.hivyo kama unasumbuliwa na meno basi huu ni muda mzuri wa kuachana nayo.

7. Addiction; soda nyingi zina tabia ya kumfanya mtu apate ulevi wa soda husika yaani kuna watu unakuta anapenda sana soda fulani na asipoinywa kwa siku atahisi kama amepungukiwa kabisa na kitu fulani mwilini.hii itakufanya uwe mtumwa wa mwili wako mwenyewe.

8. Huongeza kasi ya uzee; sumu ambazo unazipokea kwenye soda zinazeesha mtu mapema sana yani kijana mdogo wa miaka 20 hujikuta anaonekana kama miaka 35.

9. Hupunguza sana maji mwilini ; soda ina kiwango kikubwa cha madini ya sodium ambayo humfanya mtu abaki na maji kidogo na kwa muda mrefu atapata matatizo mengine ya kiafya kama mawe ya kwenye figo[kidney stone] na mawe kwenye nyongo ya binadamu.
Mwisho; ni vizuri kubadili mfumo wako wa maisha na kuanza kunywa vitu haviharibu mwili yaani badala ya kunywa soda basi tumia juice ya matunda yakutengeneza mwenyewe ambayo ni mbadala mkubwa wa soda, lakini pia unaweza kunywa maziwa na kadhalika.

UNAKARIBISHWA

JE , WEWE UNATAMBUA ?

Uimbaji ni moja ya kalama ambayo Mungu alimpatia mwanadamu ili amsifu .Mungu anasema mnitukuze kwa nyimbo , matendo mema na hiyo ndio ibada kamili kwangu.







wahubiri wengi wanafanya kazi pamoja na waimbaji katika ulimwengu
huu , wanadamu wote haijarishi unakalama au hauna lazima ufanye
kwa nafasi yako , kama kuhubiri hubiri kama kuimba imba ,kama
kufundisha fundisha ,kama kushuhudia shuhudia kwa kufanya hivyo
kristo anatukuzwa.

WEWE UKARIBU YA NANI?

NENO LA LEO - MTAZAME ALIYE KARIBU NAWE

 Zaburi:34:18 "Bwana yu karibu nao waliovunjika moyo, Na waliopondeka roho huwaokoa".

Ni jambo la kawaida kuona watu wakihangaika kutafuta msaada juu ya changamoto zinazo wapata. Ndivyo tunashuhudia wengine wanachukua maamuzi magumu hata ya kujiua, baada ya kushindwa kupata msaada. Hebu kila mmoja apige picha, tatizo linapotokea, nani anakuwa wa kwanza kumwendea ili kupata msaada? Wengi watakuambia, ni wazazi, au mume, au mke, au Rafiki, au daktari bingwa, au Mchungaji n.k. kutokana na aina ya tatizo.

Neno la leo linatukumbusha kuwa; mbali na kumtegemea mtu fulani mwenye uwezo wa kukusaidia unapopitia machungu katika maisha haya, Karibu yako yupo Mungu mwenye uwezo zaidi ya wote wanaoweza kutegemewa. Mara nyingi shetani ametudanganya na kututenga na Upendo wa Mungu, na hatimaye akitujeruhi, tunakosa ujasiri wa kuutegemea mkono wa Mungu, macho huwa hayaoni, giza la machungu na simanzi huujaza moyo, na hatimaye wengine, huamua kujiua, wengine huishia kuugua vidonda vya tumbo na shinikizo la damu.

Kumbuka, mwanadamu yeyote sio wa kutegemewa, wakati wowote anaweza kugeuka au hali ikabadilika, wengi wamejeruhiwa na wenzi wao waliokuwa wameijaza mioyo yao, na wameishia kuathirika kwa namna fulani, katika hali kama hiyo ni Mungu pekee aliye Karibu sana na kila mmoja, anaweza kukuokoa katika hali ya kuvunjika moyo.

Unapojeruhiwa na kuumizwa moyo, iwe kwa magonjwa, iwe kwa kuteswa na nguvu za uchawi au majini, iwe kwa kukosa ajira, iwe kwa kushindwa masomo, iwe kwa umaskini, iwe kwa kufiwa na mwenzi, iwe kwa biashara kuporomoka, iwe kuonewa kazini, iwe kwa kukosa mchumba, iwe kwa mwenzi wa ndoa kukutesa kimahusiano, iwe ni kutengwa na marafiki, iwe ni kuonewa na ndugu, iwe ni changamoto yoyote inayo kuumiza na kujeruhi moyo wako; Mungu yuko Karibu nawe KUKUOKOA, mtazame yeye utakuwa salama. Yesu alikufa kwa ajili yetu, ili tuokolewe na kupatanishwa na Mungu Baba, mtazame yeye Uokolewe.

MAANA YA MAJINA YA SIKU

Sabato ni lini? Jumamosi, Jumapili au Ijumaa??

Kwa nini kuna mivutano ya siku za Ibada ?   Tangu mwanzo, Biblia inasemaje juu ya suala la kumwabudu Mungu ?

1. 1. Je, Mungu aliwaagiza watu waitunze Sabato ?
Jibu : Ndiyo ! Ushahidi wa Biblia.
Mwanzo 2:2-3… “Na siku ya saba Mungu alimaliza kazi yake yote aliyoifanya; akastarehe siku ya saba, akaacha kufanya kazi yake yote aliyoifanya. Mungu akaibarikia siku ya saba, akaitakasa kwa sababu katika siku hiyo Mungu alistarehe, akaacha kufanya kazi yake yote aliyoiumba na kuifanya”.

1. 2. Je, Adamu na Ibrahimu waliitunza Sabato?
Jibu : Ndiyo ! Ushahidi wa Biblia
Mwanzo 2:2-3. Adamu aliitunza Sabato
Mwanzo 26:5 Kwa sababu Ibrahimu alisikia sauti yangu, akayahifadhi maagizo yangu, na amri zangu, na hukumu zangu, na sheria zangu.
Ibrahimu alitunza Amri za Mungu ikiwemo na Sabato(Amri ya Nne).

1. 3. Je, kuna Amri yoyote inatutaka tuitunze Sabato?
Jibu : Ndiyo ! Ushahidi wa Biblia.
Kutoka 20:8-11 Ikumbuke siku ya Sabato uitakase. Siku sita fanya kazi, utende mambo yako yote; lakini siku ya saba ni Sabato ya Bwana, Mungu wako, siku hiyo usifanye kazi yo yote, wewe, wala mwana wako, wala binti yako, wala mtumwa wako, wala mjakazi wako, wala mnyama wako wa kufuga, wala mgeni aliye ndani ya malango yako. Maana, kwa siku sita Bwana alifanya mbingu, na nchi, na bahari, na vyote vilivyomo, akastarehe siku ya saba; kwa hiyo Bwana akaibarikia siku ya Sabato akaitakasa. (linganisha na Mwanzo 2:2-3)

4. Siku ya Sabato ni ipi ndani ya Juma?
Jibu: Jumamosi! Ushahidi wa Biblia.
Ndani ya Biblia hakuna majina ya siku ya Jumatatu, Jumanne, n.k. isipokuwa kwa Biblia ya Kiswahili cha Kisasa. Ndani ya Biblia Mungu aliziita siku ya kwanza, pili, tatu, n.k (Mwanzo 1…).
Kibiblia Yesu alifufuka siku ya Kwanza ya Juma, yaani Jumapili. Fanya hesabu rahisi! Siku ya Saba itakuwa ni lini? Daima ni Jumamosi.

Majina haya yalitokea wapi?
Mf: Kiingereza
1. Sunday , siku ya jua, siku ya mungu mume wa Roma ya kale ya kipagani.
2. Monday, siku ya mwezi, mungu mke wa Roma ya kale ya kipagani.
3. Tuesday, siku ya mungu tuis wa Roma ya kale ya kipagani.
4. Wednesday, siku ya mungu wenes wa Roma ya kale ya kipagani.
5. Thursday, siku ya mungu thrus wa Roma ya kale ya kipagani.
6. Friday, siku ya mungu frigus wa Roma ya kale ya kipagani.
7. Saturday, siku ya mungu satun wa Roma ya kale ya kipagani.
Kiswahili:
Waswahili wao walifuata utaratibu wa waarabu katika kuita siku majina. Lengo la waarabu, ni kuifanya siku ya ijumaa kuwa siku ya saba(siku ya kusanyiko la ibaada). Lakini pamoja na jitihada zao hizo, walichemka mahali. Fuatilia uone!!
1. Jumamosi, siku ya kwanza ya juma
2. Jumapili, siku ya pili ya juma
3. Jumatatu, siku ya tatu ya juma
4. Jumanne, siku ya nne ya juma
5. Jumatano, siku ya tano ya juma
6. Alhamisi, (neno la kiarabu lenye maana ya –a tano=alhamsa) ya sita ya juma
7. Ijumaa, siku ya saba ya juma(sabato ya waarabu/waislamu)
Jiulize, utatokaje ya tano(Jumatano) uende ya tano(alhamisi) tena??
Msaada zaidi, angalia kamusi zozote za Kiingereza za zamani, zitakupatia maana halisi za majina ya siku. Mf. Collins English Dictionary, 1979 reprited on 1984.
Uthibitisho wa kibiblia unaonesha kuwa, siku ya Sabato ni Jumamosi kama leo inavyojulikana. Angalia!
Mathayo 28:1 Hata sabato ilipokwisha, ikipambazuka siku ya kwanza ya juma, Mariamu Magdalene, na Mariamu yule wa pili, walikwenda kulitazama kaburi.
Marko 16:2 Hata alfajiri mapema, siku ya kwanza ya juma, wakaenda kaburini, jua lilipoanza kuchomoza;
Marko 16:9 Naye alipofufuka alfajiri siku ya kwanza ya juma, alimtokea kwanza Mariamu Magdalene, ambaye kwamba alimtoa pepo saba.
Luka 24:1 Hata siku ya kwanza ya juma, ilipoanza kupambazuka, walikwenda kaburini, wakiyaleta manukato waliyoweka tayari.
Yohana 20:1 Hata siku ya kwanza ya juma Mariamu Magdalene alikwenda kaburini alfajiri, kungali giza bado; akaliona lile jiwe limeondolewa kaburini.
Yohana 20:19 Ikawa jioni, siku ile ya kwanza ya juma, pale walipokuwapo wanafunzi, milango imefungwa kwa hofu ya Wayahudi; akaja Yesu, akasimama katikati, akawaambia, Amani iwe kwenu.
Yesu alifufuka siku ya jumapili ambayo Biblia inaiita kuwa ni siku ya kwanza ya juma. Kama Yesu alifufufuka siku ya kwanza ya juma(jumapili), Sabato itakuwa lini??
Jibu: Jumamosi

1. 5. Je, Yesu alifundisha kuishika Sabato??
Jibu: Ndiyo! Yesu ni kielelzo chetu kwa matendo yake na mwenendo wake wa maisha. Chochote alichokifanya na kukisema Yesu, ni sharti tukienzi…
Marko 1:21 Wakashika njia mpaka Kapernaumu, na mara siku ya sabato akaingia katika sinagogi, akafundisha.
Marko 6:2 Na ilipokuwa sabato, alianza kufundisha katika sinagogi; wengi waliposikia wakashangaa, wakisema, Huyu ameyapata wapi haya? Na, Ni hekima gani hii aliyopewa huyu? Na, Ni nini miujiza hii mikubwa inayotendeka kwa mikono yake?
Luka 4:16 Akaenda Nazareti, hapo alipolelewa; na siku ya sabato akaingia katika sinagogi kama ilivyokuwa desturi yake, akasimama ili asome.
Luka 4:31 Akashuka mpaka Kapernaumu, mji wa Galilaya, akawa akiwafundisha siku ya sabato;
Luka 13:10 Siku ya sabato alikuwa akifundisha katika sinagogi mojawapo.
Luka 6:6 Ikawa siku ya sabato nyingine aliingia katika sinagogi akafundisha; na mlikuwamo mtu ambaye mkono wake wa kuume umepooza.

1. 6. Je, kanisa la awali lilikutana siku ya Sabato kuabudu?
Jibu: Ndiyo. Mitume wa Yesu na mitume waliofuata walikutana siku ya sabato kuabudu.
Ushahidi wa Biblia:
Matendo ya Mitume 13:14 Lakini wao wakatoka Perge, wakapita kati ya nchi, wakafika Antiokia, mji wa Pisidia, wakaingia katika sinagogi siku ya sabato, wakaketi.
Matendo ya Mitume 13:27 Kwa maana wakaao Yerusalemu, na wakuu wao, kwa kuwa hawakumjua yeye, wala maneno ya manabii yanayosomwa kila sabato, wameyatimiza kwa kumhukumu.
Matendo ya Mitume 13:42 Na walipokuwa wakitoka, wakawasihi waambiwe maneno haya sabato ya pili.
Matendo ya Mitume 13:44 Hata sabato ya pili, watu wengi, karibu mji wote, wakakusanyika walisikie neno la Mungu.
Matendo ya Mitume 15:21 Kwa maana tangu zamani za kale Musa anao watu wahubirio mambo yake; katika kila mji husomwa kila sabato katika masinagogi.
Matendo ya Mitume 16:13 Hata siku ya sabato tukatoka nje ya lango, tukaenda kando ya mto, ambapo tukadhani ya kuwa pana mahali pa kusali; tukaketi, tukasema na wanawake waliokutana pale.
Matendo ya Mitume 17:2 Na Paulo, kama ilivyokuwa desturi yake, akaingia mle walimo, akahojiana nao kwa maneno ya maandiko sabato tatu,
Matendo ya Mitume 18:4 Akatoa hoja zake katika sinagogi kila sabato, akajaribu kuwavuta Wayahudi na Wayunani
Paulo bado anasisitiza
Waebrania 4:9 Basi, imesalia raha ya sabato kwa watu wa Mungu.

7.Je, Mungu ana watu wake maalumu tu?
Jibu :Ndiyo
Math 7 :21 Si kila mtu aniambiaye, Bwana, Bwana, atakayeingia katika ufalme wa mbinguni; bali ni yeye afanyaye mapenzi ya Baba yangu aliye mbinguni.
Je, mapenzi ya Baba yake ni yapi ?
Zaburi 40 :8 Kuyafanya mapenzi yako, Ee Mungu wangu, ndiyo furaha yangu; Naam, sheria yako imo moyoni mwangu.

1. 8. Je, mtu anaweza kumpenda Yesu bila kushika Amri zake 10?
Hasha!! Yeye anasema;
Yoh 14:15(mkinipenda mtazishika amri zangu)
Yohana 14:21 (Yeye aliye na amri zangu, na kuzishika, yeye ndiye anipendaye; naye anipendaye atapendwa na Baba yangu; nami nitampenda na kujidhihirisha kwake).
Yohana 15:10 (Mkizishika amri zangu, mtakaa katika pendo langu; kama vile mimi nilivyozishika amri za Baba yangu na kukaa katika pendo lake).

1. 9. Je, inawezekana kushika Amri 9 tu isipokuwa Sabato?
Hasha!! Haiwezekani kabisa, Biblia inasema;
Yakobo 2:10 Maana mtu awaye yote atakayeishika sheria yote, ila akajikwaa katika neno moja, amekosa juu ya yote.
1 Yohna 2:3-5 Na katika hili twajua ya kuwa tumemjua yeye, ikiwa tunashika amri zake. Yeye asemaye, Nimemjua, wala hazishiki amri zake, ni mwongo, wala kweli haimo ndani yake. Lakini yeye alishikaye neno lake, katika huyo upendo wa Mungu umekamilika kweli kweli. Katika hili twajua ya kuwa tumo ndani yake.
1 Yohana 5:2-3 Katika hili twajua kwamba twawapenda watoto wa Mungu, tumpendapo Mungu, na kuzishika amri zake. Kwa maana huku ndiko kumpenda Mungu, kwamba tuzishike amri zake; wala amri zake si nzito.

1. 10. Je, Sabato itakuwepo hadi mbinguni ?
Jibu : Ndiyo
Nabii Isaya alioneshwa watakatifu wakienda mbele za Mungu kuabudu siku ya Sabato mbinguni. Yohana naye alioneshwa sanduku la Agano (la Amri 10 ikiwemo sabato) liko hekalu la mbinguni.
Isaya 66 :22 Kama vile mbingu mpya na nchi mpya, nitakazofanya, zitakavyokaa mbele zangu, asema Bwana, ndivyo uzao wenu na jina lenu litakavyokaa. 23 Na itakuwa, mwezi mpya hata mwezi mpya, na sabato hata sabato, wanadamu wote watakuja kuabudu mbele zangu, asema Bwana.
Ufunuo 11 : 19 Kisha Hekalu la Mungu lililoko mbinguni likafunguliwa, na sanduku la agano lake likaonekana ndani ya hekalu lake. Kukawa na umeme, na sauti, na radi, na tetemeko la nchi, na mvua ya mawe nyingi sana.

1. 11. Je kuna haja ya kutunza Sabato leo?
Jibu : Ndiyo. Kuitunza Sabato ya siku ya saba (Jumamosi) ni kumtangaza Mungu kuwa ni Mkuu, Muumbaji na Mwenye Vyote ! Shetani anajitahidi sana kufumba uelewa wa watu wasilitambue hili na kuendelea kumwadubu yeye mungu wa dunia hii. Tunaposali Jumapili au Ijumaa, tunamkana Mungu kuwa si Muumbaji, Mkuu na Mwenye vyote. Rejea Amri ya 4 Kutoka 20 :8-11
Hakuna wokovu kwa waliokwisha sikia habari za Sabato ya Yahwe watakaokolewa .
Mpinga Kristo ameibuka na kuleta mafundisho potofu na kinyume cha makusudi ya Mungu. Anatumia manabii, wachungaji, walimu nk kufundisha watu mapotofu, wakidai Bwana Mungu alisema hivi ijapo Bwana Mungu hakusema lolote…
Ezekieli 22:26Makuhani wake wameihalifu sheria yangu, wametia unajisi vitu vyangu vitakatifu; hawakuweka tofauti ya vitu vitakatifu na vitu vya kutumiwa sikuzote; wala hawakuwafundisha watu kupambanua vitu vichafu na vitu vilivyo safi, nao wamefumba macho yao, wasiziangalie sabato zangu, nami nimetiwa unajisi kati yao.
Wapendwa kuna haja ya kuchunguza hili kwa makini, tuache ubishi wa kidini badala yake, tuangalie sana kuyatenda mapenzi ya Mungu ambayo ni kushika Amri zake.
Zaburi 40:8 Kuyafanya mapenzi yako, Ee Mungu wangu, ndiyofuraha yangu; Naam, sheria yako imo moyoni mwangu.
Sheria ya Mungu inapokaa mioyoni mwetu, tutazishika Amri zake zote 10 kama vigezo vya sisi kwenda mbinguni. Tusipoenenda sawasawa na neno lake, hakuna asubuhi kwetu…
‘Na waende kwa sheria na ushuhuda; ikiwa hawasemi sawasawa na neno hili, bila shaka kwa hao hapana asubuhi’. Isaya 8 :20.
Chagueni hivi ni nani mtakayemtumikia kuwa ni Mungu au Baali(Shetani na sabato yake bandia). Mimi nitamtumikia Mungu(Yahwe) na Sabato yake halisi(Muhuri wake).
Hatari ya kutomtii Mungu
Ezekiel 20:21 Lakini watoto hao waliniasi; hawakuenda katika amri zangu, wala hawakuzishika hukumu zangu kuzitenda, ambazo mwanadamu ataishi kwazo kama akizitenda; walizitia unajisi sabato zangu, ndipo nikasema, kwamba nitamwaga ghadhabu yangu juu yao, ili kuitimiza hasira yangu juu yao jangwani.
Wito wa Mungu kwetu
Ezekiel 20 :19 Mimi ni Bwana, Mungu wenu; endeni katika amri zangu, mkazishike hukumu zangu, na kuzitenda;
20 zitakaseni sabato zangu; zitakuwa ishara kati ya mimi na ninyi, mpate kujua ya kuwa mimi ndimi Bwana, Mungu wenu

MTINDO WA MAISHA NA AFYA

SIRI YA MTINDO WA MAISHA ULETAO AFYA

Watafiti wanaoishi katika kipindi hiki tulicho nacho wamejitahidi sana kuithibitisha ile kweli iliyothibitishwa kwanza na Biblia kwa kutoa maelezo haya: Wanadamu ni viumbe kamili. Mara nyingi kile tunachokigawa katika sehemu za kimwili, kiakili, na kiroho ni sehemu za mtu zilizo na uwiano unaoingiliana, wala hazitenganishiki. Kwa maneno mengine, kinachoidhuru akili, kinaudhuru mwili.Hali yetu ya kiroho ina shinikizo lake juu ya hali yetu ya kimwili, na kinyume chake. Sisi ni watu kamili.

Kwa mfano watafiti wa kisayansi katika uchunguzi wao uliodhibitiwa wamegundua kwamba kicheko kile kitokanacho na furaha na shangwe huleta mabadiliko yanayoweza kupimwa katika mfumo wa kinga mwilini mwa mtu. Unaweza kabisa kuusaidia mwili wako kupigana na ugonjwa kwa vizuri zaidi ukiwa na furaha! Uchunguzi huo huonyesha jinsi akili na mwili vinavyofanya kazi yao kwa pamoja kwa ushirikiano wa karibu sana.

Katika maelfu ya miaka iliyopita Neno la Mungu lilidokeza kuwapo kwa uhusiano huo wenye nguvu kati ya akili na mwili ambao ni hivi karibuni tu umekubaliwa na kuingizwa katika nadharia ya kiganga:
"Moyo uliochangamka ni dawa nzuri, bali roho iliyopondeka huikausha mifupa" - (Mithali 17:22)

Kulingana na mtume Yohana, Je, Ni kwa karibu jinsi gani uhusiano huo uliopo kati ya akili na mwili unaathiri usitawi wetu wa kiroho?
"Mpenzi wangu, nakutakia mafanikio mema ya kila aina; nakutakia afya njema ya mwili kama ulivyo nayo rohoni" - (3 Yohana 1:2).

Muumbaji wetu anataka sisi tupate " kufurahia kuwa na afya njema " Neno la Mungu linaweza kutumika kama chemchem yetu ya afya, pamoja na kuwa chemchem yetu ya uzima wa milele.

Kwa kuwa usitawi wetu kimwili na kiakili na kiroho unakwenda bega kwa bega, Paulo anatoa kwetu ombi hili:
"Mlapo mnywapo au mtendapo neno lolote, fanyeni yote kwa utukufu wa Mungu" - (1 Wakorintho 10:31).

Injili inajumuisha mambo yote mawili, uponyaji wa mwili na uponyaji wa roho. Mtindo wa maisha uletao afya unaweza kutusaidia sisi kuwa Wakristo wenye uchangamfu mwingi.

Hapa zipo kanuni nane za kufuata endapo wewe kweli unataka kuishi maisha yenye afya na yenye manufaa mengi zaidi.

1. Hewa Safi

Hewa safi ya nje, ni ya lazima kwa afya nzuri. Wakati wa mchana na wakati wa kulala usiku, kuingiza na kuitoa hewa kwa njia inayofaa katika nyumba zetu na mahali petu pa kazi hutuhakikishia kwamba damu yetu daima itagawa oksijeni ya kutosha kila sehemu ya mwili wetu. Kuvuta pumzi nyingi wakati wa matembezi ya asubuhi ni njia kuu ya kuupatia mwili wako oksijeni.

Aina ya hewa tuivutayo ni dhahiri kwamba ni ya maana. Jihadhari usikae mahali penye moshi au mvuke mwingi, penye hewa mbaya au hewa inayochukua vijimea vidogo sana (bacteria) kutoka mahali fulani palipojificha.

Kuvuta tumbako huichafua sana hewa na ni mojawapo ya wauaji wakuu wa siku hizi. Utafiti wa sayansi umethibitisha kuwapo kwa uhusiano unaoleta madhara kati ya tumbako na kansa ya mapafu, ugonjwa wa kuvimba mapafu na kupumua kwa shida ( emphysema) na ugonjwa wa moyo. Mazoea ya mwili kuhusiana na hiyo sumu ya nikotini katika sigareti hufanya uvutaji huo wa sigara (tumbako) uwe mmojawapo wa mazoea magumu kabisa kuachana hayo. Kuvuta tumbako kutaweza kuwaua watu milioni 12 kwa mwaka kufukia mwaka wa 2020 endapo mwendo huu wa sasa utaendelea

2. Mwanga Wa Jua

"Faida za mwanga wa jua ni nyingi:

1. Dakika kumi na tano hadi 30 za kupata mwanga wa jua kila siku katika ile sehemu ya mwanzo ya asubuhi au baadaye mchana alasiri husaidia mwili kukusanya pamoja au kutengeneza Vitamini D yake wenyewe, kirutubisho muhimu/homoni ndani ya ngozi. Vitamini D huisaidia damu kutengeneza kalisi (calcium) na fosforasi, inayoijenga na kuitengeneza mifupa.

2. Mwanga wa jua unafanya kazi yake kama dawa ya kuvika viini vya maradhi na kuua vijimea vidogo sana (bacteria)

3. Jua linatoa nguvu ambayo kwa hiyo mimea inaweza kuigeuza kaboni dioksidi na maji kuwa kabohidreti [chakula cha wanga]… Bila ya njia hiyo wanyama na wanadamu wangekufa kwa njaa

4. Jua pia linamsaidia mwanadamu kujirekebisha na kukabiliana na kazi ya usiku na kupunguza unyong'onyevu (depression) unaotokana na siku za giza wakati majira ya baridi kali yanapotokea.

Neno la tahadhari: Mwanga wa jua unaweza pia kuleta madhara kukaa kwa muda mrefu kwenye mwanga wa jua kunaweza kuiunguza ngozi, kunaweza kuongeza hatari ya kupatwa na kansa ya ngozi kunaweza kuharakisha kuzeeka, kunaweza kuyaharibu macho, na kusababisha mtoto wa jicho (cataracts). " [Madondoo yote katika Mwongozo huu yamenukuliwa kutoka katika Look up and Live: A Guide to Health, Lesoni ya Watu Wazima, Robo ya kwanza ya mwaka wa 1993, (Nampa, Idaho: Pacific Prexss Publishing Association). Mambo mengi katika Mwongozo huu ambayo hayajawekwa katika Alama za kunukuu yamefundishwa kutoka katika lesoni hiyo hiyo]

3. Kupumzika

Mwili huu ni lazima upumzike ili upate kujitengeneza upya wenyewe. Yatupasa kuwa na muda wa burudani na wa kupumzika ili kupunguza msongo utokanao na kazi pamoja na majukumu ya kifamilia. Bila kuwa na muda wa kutosha kupumzika mara nyingi watu wanakuwa na wasiwasi, mfadhaiko na hasira kali. Msongo huo wa moyo unaweza kuleta ugonjwa ambao utatulazimisha kuchukua pumziko letu ambalo miili yetu ilikuwa inataka kwa muda wote. Hakuna kitu cha badala cha kuweka mahali pa usingizi mzuri wa usiku.

Kuzichaji upya betri zetu za kiroho kwa kuweka utaratibu wa kila siku ni muhimu pia kwa afya yetu ya kimwili. Muda wa kila siku anaotumia Mkristo katika kutafakari, kusoma Biblia, na maombi utaweza kuuponya mwili pamoja na roho. Tunakuhitaji pia kupata pumziko ili kuuvunja mzunguko wa kazi, yaani, kuwa na siku ya kupumzika kila juma, na likizo ya mwaka au nusu mwaka

.

4. Mazoezi Ya Mwili

Mazoezi ya mwili ni ya muhimu sana kwa afya yetu:

1. Mazoezi ya mwili husaidia kulirekebisha shinikizo la damu.
2. Mazoezi ya mwili huiruhusu damu nyingi zaidi kuzifikia sehemu zote za mwili na kuifanya mikono na miguu ipate joto

.
3. Mazoezi ya mwili yanaondoa mambo yote mawili. Yaani mkazo wa mwili na mfadhaiko wa moyo, na kukusiadia wewe kujisikia vizuri zaidi katika maisha yako. Mazoezi ya mwili kwa kawaida ni tiba bora kabisa ya wasiwasi na msongo (stress).

4. Mazoezi ya mwili hutupatia nguvu ya umeme kwa ajili ya ubongo wetu pamoja na seli za neva. Yanaongeza afya kwa kuuamsha mfumo wa kinga mwilini (immune system). Mwili unapowekwa katika hali ya afya kwa kufanya mazoezi yanayofaa. Ubongo unakuwa na uwezo wa kufikiri kwa ubunifu na ufanisi zaidi.

5. Yanaweza kukusaidia kuiweka vizuri rangi ya uso wako na kukuweka katika hali nzuri kabisa kimwili.
6. Mazoezi ya mwili hukufanya uwe na nguvu nyingi zaidi, hivyo kuchelewesha kupatwa na uchovu kimwili na kimawazo
7. Yanausaidia ubongo wako kutengeneza dawa inayokupa wewe hali ya kujisikia vizuri na kukuongezea uwezo wa kustahimili maumivu.

Endapo wewe ulikuwa hufanyi mazoezi, basi anza taratibu (polepole) na kuongeza nguvu yake hatua kwa hatua upatapo uwezo wa kustahimili. Laweza kuwa ni jambo la busara kumwona mganga wako kabla ya kuanza mazoezi hayo. Lengo lako na liwe kujishughulisha na kila aina ya mazoezi hayo ya mwili ambayo yanaweza kulinganishwa na kutembea maili moja kwa dakika kumi na tano mara nne au zaidi kw ajuma.

5. Maji

Kwa vile maji ni ya lazima kwa kila seli mwilini, basi, ingetupasa kunywa maji mengi.
1. Kwa uzito, mwili wetu karibu asilimia sabini ni maji…
2. Mwili wetu unahitaji takribani visaga (quarts) viwili na nusu vya maji kila siku ili uweze kufanya kazi zake zote. Baadhi ya kazi hizo ni pamoja na mzunguko wa damu mwilini, kuondoa uchafu mwilini, kusafirisha virutubisho vya chakula mwilini, na kukiyeyusha chakula mwilini
3. Mtu wa kawaida anazo seli za ubongo kati ya billioni 15 na 40 hivi. Kila moja ya hizo ina maji asilimia 70 hadi 85. Maji ya kutosha kuweza kuzigawa seli hizo hukufanya uwe na akili iliyochangamka, halafu husaidia kuzuia mfadhaiko (depression) na hasira kali.
4. Si maji yale tu unayokunywa ambayo ni ya muhimu. Kuoga maji ya baridi kidogo au vuguvuvugu kila siku au kwa kutumia bafu ya manyunyu (shower) huboresha mzunguko wa damu mwilini, hivyo kuupa mwili na ubongo wako nguvu. Bafu ya manyunyu au kuoga kwa njia ya kawaida huweza pia kutuliza mishipa ya fahamu iliyochachamaa, ambayo inaweza kuleta ugonjwa kwa kudhoofisha mfumo wa kinga mwilini. Kuoga pia kunaondoa uchafu kutoka juu ya ngozi, pia kunaweza kupunguzahoma.

6. Lishe Ifaayo

Wakati ule wa uumbaji Mungu alimwagiza Adamu na Hawa kula chakula cha kokwa, nafaka na matunda (Mwanzo 1:29). Baada ya Adamu na Hawa kutenda dhambi, ziliongezwa mboga za majani katika lishe yao
(Mwanzo 3:18). Baada ya ile gharika, Muumbaji aliongeza nyama ya wanyama "safi" katika lishe yao (Mwanzo 7:2-3, 9:1-6)

Nyama ya wanyama ina mafuta ya majimaji (saturated fat) na mafuta mazito kolestero [cholesterol], ambayo yote huongeza hatari ya kupatwa na shinikizo la damu, kupooza (stroke), ugonjwa wa moyo, kansa, unene usio wa kawaida, kisukari na magonjwa mengineyo. Leo matabibu wengi wanawashauri wale wanaokula nyama kula mnofu ule tu usiokuwa na mafuta, uliopikwa vizuri, pamoja na kula samaki na kufanya hivyo kwa nadra sana.

Kwa vile watu wanaokula chakula cha mimea wana afya bora zaidi, tena wanaishi kwa muda mrefu zaidi, wataalamu wengi wa lishe na afya wanatusihi sana sisi ili tupate kufikiria kukirudia chakula kile cha awali walichopewa wanadamu cha kokwa, nafaka na matunda pamoja na mboga za majani zilizoongezwa.

Ukitaka kuanza kula vyakula vya mimea, hakikisha kwamba unaelewa kwanza namna ya kuandaa lishe bora bila kutumia nyama. Ule kiasi cha chakula kinachomtosha mtu kula kwa siku (migawo [serving] mitano au sita hivi) ya aina mbalimbali za matunda, pamoja na kokwa [karanga n.k.] nafaka, maharage, kunde, mbaazi na mboga za majani. Mboga za majani za kijani na za njano, pamoja na machungwa ni za muhimu sana. Tumia unga wa nafaka isiyokobolewa na mchele mwekundu (brown rice) badala ya ule mweupe. Ulaji wako wa wanga na sukari za mchanganyiko ungekuwa katika migawo (servings) sita au zaidi kwa siku moja. Badilisha matumizi yako ya mafuta ya wanyama (samli, siagi, mafuta ya nguruwe, shahamu izungukayo figo, n.k.) kwa kutumia mafuta ya mimea. Lishe hiyo juu inatosha bila kutumia nyama kama wewe unatumia vitu vinavyotokana na maziwa.

Wale wanaochagua kula nyama kama sehemu ya chakula chao, wangepaswa kuzila nyama zile tu ambazo Biblia inasema ni "safi"au zile zinazofaa kuliwa na wanadamu. Mungu alipowaruhusu wanadamu kula nyama baada ya gharika (Mwanzo 7:2-3) (Mambo ya walaei 14:47), alibainisha nyama za wanyama gani zilikuwa safi, na zipi zilikuwa najisi na zilikuwa hazifai kuliwa.

Soma katika Mambo ya Walawi 11 na Kumbukumbu la Torati 14 orodha ya ndege, wanyama, na samaki ambao Mungu alisema hawafai kuliwa. Kwa mujibu wa sura hizo, wanyama safi ni lazima kwato zao zigawanyike na pia wacheue. Samaki safi ni lazima wawe na magamba na mapezi, vyote viwili. Ndege wanaokula uchafu ni marufuku kuliwa.

Miongoni mwa wanyama najisi, kwa namna ya pekee nguruwe wanatajwa kwa kulaaniwa (Kumbukumbu la Torati 14:8) Asilimia ya juu ya miili ya wanadamu inayofanyiwa uchunguzi na waganga imejaa minyoo isiyokufa ya trikina (trichinae). Minyoo hiyo midogo sana inahamishiwa kwa wanadamu wale wanaokula nguruwe walioambukizwa minyoo hiyo. Utafiti wa kisanyansi wa siku hizi unazidi kufunua sababu zinazoonyesha kwa nini Mungu alitangaza nyama za wanyama fulani kuwa ni najisi. Sababu moja huenda ikawa ni yale matokeo yanayoleta uharibifu mkubwa kutokana na mafuta ya wanyama ya majimaji katika mfumo wa mwili wa kibinadamu wa kuyeyusha chakula.

7. Epuka Vitu Vinavyoleta Madhara

Je, ni maonyo gani ambayo Biblia inatoa kuhusu vinywaji vyenye alcohol ndani yake?
"Mvinyo hudhihaki na kileo huleta ugomvi; Na akosaye kwa vitu hivyo hana hekima" - Mithali 20:1

Wala wezi wala watamanio, wala WALEVI, wala watukanaji hawataurithi ufalme wa Mungu" - (1 Wakorontho 6:10).

Alkoholi huathiri mifumo ya mwili ifuatayo:
1. Mfumo wa kinga mwilini - Alkoholi inapunguza uwezo wa chembechembe nyeupe wa kupigana na ugonjwa, hivyo kuzidisha hatari ya kupatwa na nimonia (pneumonia), kifua kikuu, homa ya manjano, na kansa za aina kadhaa.
2. Mfumo wa tezi (endocrinesystem) zinazotoa majimaji mwilini - Vinywaji viwili tu au vitatu kwa siku huzidisha hatari ya kuharibika mimba, kuzaa watoto waliokufa, na watoto waliozaliwa kabla ya wakati wake.
3. Mfumo wa mzunguko wa damu mwilini Matumizi ya alkoholi huzidisha hatari ya kupatwa na ugonjwa wa moyo, hupunguza sukari katika damu, na kuzidisha kiwango cha mafuta katika damu na kuongeza mapigo ya moyo, hivyo kuzidisha shinikizo la damu.
4. Mfumo wa kuyeyusha chakula - Alkoholi inaleta kuwasha tumboni, na kwa njia hiyo kusababisha kutoka damu katika tumbo hilo… Mazoea ya kutumia alkoholi huzidisha hatari kwa ini kuw ana mafuta mengi, homa ya manjano, na ugonjwa wa ini (cirrhosis).

Alkoholi inahusika na asilimia kubwa ya watu wanaojiua wenyewe, vifo vinavyosababishwa na magari, kuwatendea vibaya watoto, na ukatili uliomo nyumbani.

8. Kuutumainia Uweza Wa Mungu

Mtu anayesumbuliwa mara kwa mara na hofu au hatia ataona vigumu kwake kupata manufaa kamili kutokana na mazoea hayo ya afya tuliyotoka kuyaeleza muda mfupi tu uliopita. Lakini mtu yule mwenye imani isiyo na shaka kwa Mungu atapata chimbuko hili la mwisho litakalomletea hali njema katika maisha yake.

"Ee nafsi yangu umhimidi BWANA, wala usizisahau fadhili zake zote - yeye anayekusamehe dhambi zako zote na KUKUPONYA MAGONJWA YAKO YOTE, ANAYEUKOMBOA UHAI WAKO na kaburi" - Zaburi 103:2-4.

David Larson, mshauri wa Taasisi ya Taifa ya Afya ya Akiliki kule Marekani, alifanya utafiti wake mpana juu ya uhusiano wa moja kwa moja uliopo kati ya dini na afya.Uchunguzi wake ulionyesha wazi kwamba upo uhusiano wa moja kwa moja kati ya Mkristo aliyejitoa na afya. Alishangaa kujua kwamba, wale wanaohudhuria kanisani wanaishi kwa muda mrefu kuliko wale wasiohudhuria. Wale wanaokwenda kanisani wana upungufu wa kupatwa na mshtuko wa moyo, Mishipa ya arteri kuwa migumu, shinikizo la damu, na magonjwa mengine. Wale wanaomwamini Mungu huishi maisha yenye manufaa zaidi kwa sababu hawapatwi kirahisi na mfadhaiko, hawageuki na kuwa walevi sugu, kufungwa kama wahalifu wanaorudia mle tena na tena, na kunaswa katika ndoa isiyo na furaha. Kuutamainia uweza wa Mungu ndio msingi wa ustawi wa kweli na maisha ya afya yenye furaha.

Waadventista, Wasabato wapatao 50,000 hivi walichunguzwa, hasa kule California kwa kipindi cha zaidi ya miaka 30. Matokeo yalionyesha kwamba Waadventista wanaume wanaishi miaka 8.9 na wanawake miaka 7.5 kuliko
watu wengine wote kwa jumla.

 Uchunguzi huo wa Waadventista kule Uholanzi, Norway na Polandi huonyesha matokeo yanayofanana na hayo. Watafiti wanaona kwamba sababu ya kipindi kirefu cha kuishi kwa Waadventista inatokana na kuzifuata kwao baadhi au kanuni zote nane za afya zilizoelezwa katika mwongozo huu. Wale wanaozifuata kanuni hizi sio tu kwamba wana maisha marefu zaidi, bali pia wana maisha yaliyo bora sana.

Tukiutumia mtazamo wa Biblia katika maisha yetu tutakuwa tofauti katika aina zote za njia za utendaji wetu na kutoa ushahidi unaovutia kuonyesha kwamba katika ulimwengu mzima Ukristo ni dini inayoweza kuwekwa katika vitendo. Inawabadilisha watu - yaani, fikra zao na matendo yao na kujenga mtindo mpya wa maisha.

Kutokana na uhusiano wa karibu sana uliopo kati ya akili, mwili na maisha yetu ya kiroho, Wakristo wale wanaoishi kwa Neno la Mungu watataka kuzifuata kanuni hizo za mtindo wa maisha uletao afya wanapojiandaa kwa ajili ya marejeo yake Yesu (1 Yohana 3: 1-3). Sio tu kwamba Kristo anataka sisi tuwe tayari kukutana naye atakaporudi, pia anataka kuyaboresha maisha yetu ya sasa. Tunaweza kushirikiana naye kwa kuzifuata hizo kanuni za afya za Mungu.

Yesu anaahidi kutuokoa sisi mbali na kila tabia iletayo uharibifu mwilini kwa " kadri ya nguvu [yake] itendayo kazi ndani yetu" (Waefeso 3:20). Endapo wewe unajitahidi kuishinda tabia fulani inayokuathiri mwili wako kama vile kutumia tumbaku au kunywa vileo, basi, maazimio yako hayo mazuri sana ya kutaka kuacha tabia hiyo mara nyingi yanageuka na kuwa kwako kama kamba za mchanga. Lakini kwa kuuchota uwezo wa Mungu unaotenda kazi ndani yako Mungu aweze kukupa wewe nguvu za kukuwezesha kushinda. Neno la Mungu linaahidi hivi: " Naweza kufanya mambo yote kwa njia yake Kristo anitiaye nguvu" (Wafilipi 4:13)